بين السطور مش أي عين ممكن تشوف
بين السطور محتاج عيون الفيلسوف
عشان يبان بين الحروف
إللي إستخبى ورا الحروف
الخوف أمان والأمن خوف
والنور ضلام والضلمة نور
كل الأمور غير الأمور بين السطور
بين السطور ممكن يبان أصل الحقايق
بين السطور تلقى الجنان للعقل لايق
وحاجات كتير بين السطور ممكن تدايق
لكن حاجات أكتر بتملاني بسرور بين السطور
بين السطور فهمت قصدك
رغم إنك مش صريح
لكن إذا نزف الجريح
بين السطور بيكون فصيح
واقف كما الطير الدبيح لكن فخور
وبدم طاهر لو يسيح بريحه أجمل م العطور
يملى الصدور ويشع نور بين السطور
بين السطور أسرار كتير متكتمة
بين السطور أفواه كتير متكممة
وألف مليون مظلمة تهمس بصوت الهمهمة
وعيون بتنظر للسما رغم الحقيقة المعتمة
وقلوب حزينة إنما مليـانة بالنور والحنان
وبالأمل والمُر دايمــاً محتمل ويّا الإيمان
وإن كنت في وقت الأدان بــره القبور
أصبر تلاقي الفجـر بـان بين السطـور
كل إللي شوفته فـ الحياة له وجه أخر مختفي
تايه كما طوق النجاه نادر كما الخِل الوفي
لكن إذا قلبك لقاه وأخدته بالحضن العفي
قول لجناحاتك رفرفي زي الطيور
وإطلع من السجن الحزين
تغرف من الكنز الدفين بين السطور
اسامة عبد الصبور
كتبها مروة في 01:50 صباحاً ::
48 تعليق
في21,أيلول,2006 - 10:50 صباحاً, ۞ أفندينا ۞ كتبها ...
لا تحسبن رقصي بينكم طربا ...فالطير يرقص مذبوحا من الألم ......قصيده جميله وإن كانت حزينه على الصبح وأنا لسه متفرج على اليوم التالت من الفكر الجديد وكان سي جمال بيخطب من شويه ....يعني أنا رايق جدااااا ومفيش حاجه مضيقاني خااااااالص ....لنا عوده مساء بأذن الله .... صباح شريف بنتنا مروه .
في21,أيلول,2006 - 11:47 صباحاً, HESHAM FAYED كتبها ...
وعيون بتنظر للسما رغم الحقيقة المعتمة
وقلوب حزينة إنما مليـانة بالنور والحنان
وبالأمل أرجو أن ينتشر الأمل بين الجميع و شكرا علي زيارتك مدونتي
في21,أيلول,2006 - 02:33 مساءً, عبدالله النقيدان كتبها ...
كلمات جميلة ورائعه . . تستحق القراءة بتمعن . تحياتي لك
في21,أيلول,2006 - 06:23 مساءً, حسن مدني كتبها ...
جميلة جدا،،،، وحزينة جدا ،،،
في21,أيلول,2006 - 10:20 مساءً, مروة كتبها ...
افندينا \ اةة معلش خبطتين فالراس توجع ....صباح النور
في21,أيلول,2006 - 10:27 مساءً, مروة كتبها ...
افندينا \ بيت الشعر جميل اللى كتبتة تصدق مخدتش بالى خالص ان القصيدة حزينة ......باين عليا كنت مكتئبة وانا مش واخدة بالى ...ما علينا ....وعلى فكرة ما علينا دى اللازمة بتاعتى ....اما اعوز انقل "ما علينا "على طول تحضر......
في21,أيلول,2006 - 10:41 مساءً, مروة كتبها ...
اخوانى \ هشام و عبد الله و حسن جزاكم الله خيرا وعلى دوام التواصل ان شاء الله
في22,أيلول,2006 - 01:02 صباحاً, ۞ أفندينا ۞ كتبها ...
ما علينا ...... بيت الشعر لأحمد شوقي وأنا حافظه من وأنا لسه في اللفه زيك كده ههههههه .... ما فيش داعي للإكتئاب لأن دائما وأبدا سبحانه وتعالى موجود ينظر لنا بعين الرحمه ولله المثل الأعلى... ولكن إللي بيقولك كده من الناس إللي حاله الأكتئاب عامله معاه كونتراتو ..... بالحق عملت إدراج كويس عن معشوقتي الإسكندريه إن شاء الله حيعجبك لما ينزل في آخر رمضان ..... متنسيش ...اللبن ...وسنانك ... وغسيل الرجلين.
في22,أيلول,2006 - 10:45 صباحاً, محمود شلّح - شاعر العيون الحزينة كتبها ...
تحياتي صديقتي الغالية مروة ،كلماتك رائعة جدا أميرتي واحساسك أروع كما تعودت عليها دائما ، بالتوفيق صديقتي دائما . ........... أتمنى ان تكوني بصحه وعافية ، لك مني كل احترام وتقدير ،،،، وكل عام وأنت بألف خير ، بمناسبة قدوم شهر رمضان المبارك ، وأن يعيده علينا وأنتِ بصحه عافية ، والنصر لأمتنا والفرج قريب بإذن الله ، بالتوفيق صديقتي . .................
شكرا لكِ ........
في22,أيلول,2006 - 11:41 صباحاً, مروة كتبها ...
افندينا \ فعلا ممكن يكون لاحمد شوقى ...عشان انا مش بحبة خاااااااالص ...شخصا وشعرا .....وكويس الادراج بس خسارة انة جاى متأخر كدة ....خلاص هاشوفة عالعيد ان شاء الله عشان انهاردة اخر يوم هافتح النت بعد كدة عالعيد ان شاء الله ....ومش هانسى عشان انا معنديش سنان ...فاللفة هههههه
في22,أيلول,2006 - 11:44 صباحاً, مروة كتبها ...
اخى محمود \ شكرا لك على كلماتك الرقيقة وادام الله عليكم الصحة والعافية ..وصوما مقبولا ان شاء الله
في22,أيلول,2006 - 12:26 مساءً, عبلة زقزوق كتبها ...
كلمات جميلة وإختيار أروع ... مبدعة في إختيارك أختاه ـ ورمضان كريم ـ أعاده الله علينا أمة الإسلام بالخير والبركات والتوحد والتآلف تحت راية لاإله إلا الله ـ محبتي
في22,أيلول,2006 - 12:39 مساءً, عماد السامرائي كتبها ...
الاخت العزيزة مروة ... يمكنك مراسلتي للاشتراك في الحملة باستخدام اي بريد الكتروني وان كان من غير الياهو فسيصل وسيكون بامكاني تزويدك به ... اما بشأن اقتراح بان يقوم الاخ احمد بنشره ثم نقوم بنسخه ... يفرغ الحملة من رسالتها ومن فرصة العمل الجماعي الموحد ... ويقلل من قوة الرسالة .. وقيامها بهذا الشكل قد يساهم في جلب وسائل الاعلام لها مما يعطيها مدى اخر ... تقبلي تحيتي ..
في22,أيلول,2006 - 01:19 مساءً, المصطفى اسعد كتبها ...
إشتقنا لمثل هذه الكلمات الجميلة والمعبرة، واصلي وفقك الله ورعاك، وسأبارك لك رمضان بالعامية المغربية ،وأقول "عواشرك مبروكة إنشاء الله تدخل عليك بالصحة والعافية ،وتكوني دائما بزيان ،وفرحت بزيارتك بزاف بزاف " تحياتي
في22,أيلول,2006 - 03:23 مساءً, محمد برجيس كتبها ...
كلمات رائعة ؟؟ و افكار جميله حقا ؟؟ صحيح يا ولاد العلم نور ؟؟ دا يظهر بين السطور حكاوي و غناوي كتير ؟؟ بس احنا اللي عندنا قصر نظر ؟؟ احييكي علي هذه الكلمات و لكن اين تعليقكي انتي عليها ؟؟ و اقعدي بالعافيه ؟؟ و رمضان كريم
في22,أيلول,2006 - 07:27 مساءً, محمد وجدي كتبها ...
كل عام وأنتي بخير رمضان كريم
في22,أيلول,2006 - 07:36 مساءً, ۞ أفندينا ۞ كتبها ...
كل سنه وإنت طيبه يا مروه
في22,أيلول,2006 - 08:00 مساءً, saied ashargawy كتبها ...
كل عام وانتى بخير ورمضان كريم ولولو او جوجو مش هتفرق
في22,أيلول,2006 - 08:15 مساءً, طارق محمد محمد على كتبها ...
مروة
وانتى بخير والامة الاسلامية وان شاء الله تتغير الاحوال وتعود لنا الريادة والقوة ان شاء الله ونحرر الارضى العربية ونعود اسياد للعالم مرة اخرى باذن الله تعالى .
وبالنسبة للموضوع المنشور
فهو موضوع مميز لانك تتختارين تلك الموضوعات بعناية خاصة وان تلك السطور تحكى الكثير .
في22,أيلول,2006 - 08:47 مساءً, مروة كتبها ...
اختى عبلة \ جزاكى الله خيرا ...وتقبل الله منا ومنك
في22,أيلول,2006 - 11:54 مساءً, مروة كتبها ...
اخى عماد \ لقد ارسلت لك على مكتوب ....وشكرا لك
في23,أيلول,2006 - 12:00 صباحاً, مروة كتبها ...
اخى المصطفى اسعد \ الكتابة مش مصحوبة بالترجمة لية طيب " عواشرك ...بزبان ..بزاف"....ممكن اتوقع يعنى ...عواشرك معناها ايامك ولا تقصد العشرة الاخيرة من رمضان ...,بزبان معناها بخير ,بزاف معناها جدا ......انا باتوقع بس لو فية حاجة غلط صلح لى.......... و..رمضان كريم
في23,أيلول,2006 - 12:09 صباحاً, مروة كتبها ...
اخى محمد \ شكرا لك مهى عجبتنى عشان كدة اختارتها ونشرتها عموما تعليقى
لكن إذا نزف الجريح ......بين السطور بيكون فصيح.......أصبر تلاقي الفجـر بـان بين السطـور.....كل إللي شوفته فـ الحياة له وجه أخر مختفي....تايه كما طوق النجاه نادر كما الخِل الوفي.... ..........................."هى دى اكثر الابيات اللى عجبتنى" وشكرا لك على الزيارة و رمضان كريم
في23,أيلول,2006 - 12:10 صباحاً, مروة كتبها ...
اخى محمد وجدى \ وانت والامة الاسلامية بخير وسلام
في23,أيلول,2006 - 12:13 صباحاً, مروة كتبها ...
افندينا \ وانت طيب ..وبادعيلك تترقى عشان النجمة اللى على كتافك دى ...تبقى نجمة ونسر .....
في23,أيلول,2006 - 12:15 صباحاً, مروة كتبها ...
سعيد الشرقاوى \ وانت طيب ...لا تفرق طبعا .....لولو دة ....علاء ,
اما جوجو دة .....جمال
في23,أيلول,2006 - 12:20 صباحاً, مروة كتبها ...
طارق \ تقبل الله منك ان شاء الله ....وكلامك ليا دة
"وبالنسبة للموضوع المنشور
فهو موضوع مميز لانك تتختارين تلك الموضوعات بعناية خاصة وان تلك السطور تحكى الكثير" . .......دى شهادة كبيرة منك على طول رافع معنوياتى بصراحة ......جزاك الله خيرا
في23,أيلول,2006 - 01:48 مساءً, monzer bahani كتبها ...
كل عام وانتم بخير ورمضان كريم اعاده الله علينا وعليكم بالخير واليمن والبركات
الشاعر والكاتب الفلسطيني / منذر بهاني
في23,أيلول,2006 - 02:05 مساءً, Nour-eddine Ferhat كتبها ...
لم أر المنتجعات بين السطور يبدو أن وضعك تحسن، لكِ كل الإحترام و التقدير.
في23,أيلول,2006 - 03:17 مساءً, ۞ أفندينا ۞ كتبها ...
يابنتي أنا معلق سيفين ومقص على كتفي من زمااااااان ... صوما مقبولا بإذن الله
في25,أيلول,2006 - 06:59 صباحاً, الــواثق بـاللـه كتبها ...
اختي مروة ، اشكرك على الكلمات الجميلة ، وفقك الله
في29,أيلول,2006 - 03:35 صباحاً, ۞ أفندينا ۞ كتبها ...
بعد السحور وصلاه الفجر ....كل سنه وأنت طيبه ومستنيين عودتك
في30,أيلول,2006 - 06:33 مساءً, ۞ أفندينا ۞ كتبها ...
سألوا شيخ الأزهر ....لماذا " جمال " شهر رمضان .... فأجاب لأنه شهر " مبارك " ههههههههه....معلش تخاريف صيام ....كل سنه وأنت طيبه .
في03,تشرين الأول,2006 - 11:04 صباحاً, HESHAM FAYED كتبها ...
أنتظر المزيد من كتاباتك الرائعة
في05,تشرين الأول,2006 - 11:31 مساءً, ۞ أفندينا ۞ كتبها ...
شكلك يا مروه نزله أكل في الكنافه والقطايف لحد لما مش حتعرفي تدخلي من باب المدونه .....في إنتظار عودتك ....تحياتي وسلااااامي
في07,تشرين الأول,2006 - 12:58 صباحاً, عـــلي ابراهيــــم فهمــــي كتبها ...
طب وانت مين يا مستخبي ورا الكلام..مش برضه احسن تستريح وتروح تنام
في07,تشرين الأول,2006 - 03:41 مساءً, عماد السامرائي كتبها ...
اختي العزيزة مروة ... لم افتح ايميل مكتوب لاني لم استخدمه ولا مرة و لا احتى اعرف كيف افتحه .. الان سأحاول .... وسارد عليك .. جأت ازورك و اطمن عليكي ... في الحقيقة انا احس ان هناك شيئا ما في الموضوع ... تقليلك من التواجد له سبب و لا اتصور انه يتعلق برمضان ... على اية حال سأقرأ رسالتك اولا .. واتمنى لك الخير في كل خطوة تخطينها ... تقبلي تحيتي ....
في07,تشرين الأول,2006 - 05:05 مساءً, عماد السامرائي كتبها ...
اختي العزيزة .. ذهبت لبريدي لمكتوب .. كانت تنقصه بعض المعلومات .. وقمت بتصحيحها .. وتم تفعيل البريد .. ولم اجد اي رسالة .. يمكنك اعادة ارسال الرسالة .. وافضل ان تكون على هذا البريد emadalsamraie@yahoo.com .. تقبلي تحياتي
في13,تشرين الأول,2006 - 01:51 صباحاً, أبن آدم كتبها ... (غير موثّق)
لو انتى مهتمة بالكلام بين السطور ممكن تتابعى مدونتى الجديدة http://bine_el_sutour.blogspot.comفى أول ادراجتى قريبا ان شاء الله
في19,تشرين الأول,2006 - 01:52 صباحاً, ¤©§][§©¤][ أفنـــدينا ][¤©§][§©¤ كتبها ...
أين أنت يا مروه ...قلقتينا عليكي ... أتمنى أن تكوني وأسرتك بكل خير ... تحياتي وسلاااامي
في23,تشرين الأول,2006 - 09:35 مساءً, ¤©§][§©¤][ أفنـــدينا ][¤©§][§©¤ كتبها ...
نورت يا مروه ...عدت والعود أحمد بأذن الله ... ثم أنتي رجعتي علشان تقري عليه ...النهارده الخميس خمسه في الشهر عام خمسه ألآف خمسميه خمسه وخمسين ...أنا بهزر طبعا .... كل سنه وأنت والأسره بخير وصحه وسعاده ...ومتكليش كحك وغريبه كتيييييييير ...تحياتي وسلااااامي
في24,تشرين الأول,2006 - 01:44 صباحاً, مجهول كتبها ...
الحمد لله انكى بخير يا مروه ... فينك من زمان لعل يكون المانع خيرا ... وكل عام وانتى والمسلمين بخير وعيد سعيد على الجميع ( بلاش اقول عيد مبارك لتفهمى قصدى غلط ) الافوكاتو المصرى
في24,تشرين الأول,2006 - 02:08 صباحاً, طارق محمد محمد على كتبها ...
مروة انا صاحب التعليق السابق ..... عيد مبارك للجميع ما عدا المصرين عيد سعيد .
في26,تشرين الأول,2006 - 08:04 مساءً, مروة كتبها ...
اخوانى كل عام وانتم بخير جزاكم الله خيرا على السؤال....وانا الحمد لله بخير
في27,تشرين الأول,2006 - 05:36 صباحاً, مجهول كتبها ...
مروه ...والله أنا بين السطور شامم ريحه مش كويسه ...يمكن ريحه ملوخيه من غير تقليه ...ههههههه...المهم أنا حاسس إن فيه حاجه بعداكي عن المدونه ...أنا أتمنى من الله أن تكوني أنت وأهلك ومن تحبين بخير ...ثم أي شيئ آخر ممكن تعويضه .... عموما تحياتي وسلاااامي لك والعنوان إللي جاي عنوان البريد الخاص بي ويا ريت نطمن عليكي
msalaheldeen@maktoob.com
بالحق فيه إدراج عندي عن إسكندريه تبقي ياريت تشوفيه ...يمكن يضحكك شويه
أفنـــــــــــدينا إللي كان ولي النعم
في31,تشرين الأول,2006 - 04:14 صباحاً, مروة كتبها ...
السلامو عليكو .....اخوانى شكرا ليكو جميعا على مشاركتكو ليا فمدونتى وعذرا لانى مشغولة جدا اليومين دول ....وان شاءالله هارد علي كل واحد منكم وقت اخر ........فى امان الله
في01,تشرين الثاني,2006 - 02:29 صباحاً, ¤©§][§©¤][ أفنـــدينا ][¤©§][§©¤ كتبها ...
احتمالات ...... ربما الماء يروب ،
ربما الزيت يذوب،
ربما يحمل ماء في ثقوب ،
ربما الزاني يتوب ،
ربما تطلع شمس الضحى من صوب الغروب ،
ربما يبرأ شيطان ، فيعفو عنه غفار الذنوب،
.إنما لايبرأ الحكام في كل بلاد العرب من ذنب الشعوب .....
أحمـــــــــــــــــــــــــــد مطر
هذه الزياره لمجرد التحيه ... كان الله في عونك وعوننا
في05,تشرين الثاني,2006 - 11:18 مساءً, مروة كتبها ...
بسم الله الرحمن الرحيم \ حلو قوى الزجل بتاع احمد مطر ...انا اول مرة اقرا التعليق بتاع مجهول دة ودخلت لية باسم مجهول يابنى ...عموما انا نزلت كتبت موضوع دلوقتى مش موضوع انما خواطر طبعا ... وانا الحمد لله بخير وسلامى للجميع ....وشوفت موضوع اسكندرية طبعا والصور جميلة ....سلام