تسعة خمسة .. تسعة خمسة
إتصل قبل امّا تنسى
كله بعد السحب فايز
عندنا مخزن جوايز
ياللا قوم اطلب أوام ان كنت عايز
خلى بالك
الدقيقة بنص أهيف
و بصراحة ان كنت هايف .. إحنا أهيف 
قلنا لازما نسحبك من دم قلبك
إما تخسر .. أو هتخسر
بس إوعى ف مرة تسأل
أو تبص ف يوم وراك
لجل نقدر نلسعك من فوق قفاك
وبدون هزار
الحكاية ف أصلها لعبة قمار
نسألك و يكون سؤالنا
أغبى من مخ الحمار
واما هتشوف الفاتورة
تركبك حالة شحار 
غصب عنك
أو بخاطرك برضه لازم تتصل
و الطريقة اللى ف إيدينا
واحدة فى الإعلان بترقص
فيه طرق سهلة وْ رِخيصة
بس قلنا ان العرايا فى النهاية
برضه أرخص
ياللا قوم
طب لإمتى و فين هتقعد وانت بتعد النجوم
قوم و حقق ياللا حلمك
نوعدك .. هتبيع هدومك
هو ده منظر هدوم ؟؟؟
واوعى تنسى
تسعة خمسة .. تسعة خمسة
آخرتك ويانا هوسة
أو تلاقى الضغط عالى
تتلحس و تقول جرى لى
مش هقوللك تانى جرب
دى الدقيقة بنص أهيف .. نص أهيف
و بصراحة ان كنت هايف ...
هم اهيف
كلمات \ محمود موسى
كتبها مروة في 06:35 مساءً ::
17 تعليق
في09,كانون الأول,2006 - 06:42 مساءً, (¯`·._.·(واحدتاني)·._.·°¯) كتبها ...
احييك على ذوقك في الاختيار كلمات ناقدة وحرفية وفنية عالية ....تحياتي(واحدتاني)......والسلام
في09,كانون الأول,2006 - 11:13 مساءً, حسن مدني كتبها ...
ملعــوبة...
نحياني..
في10,كانون الأول,2006 - 01:34 صباحاً, ¤©§][§©¤][ أفنـــدينا ][¤©§][§©¤ كتبها ...
أولاٌ مبروك عليك الأجازه
بس ده مش موسم إمتحانات يعني الولاد الغلابة يتوعك يخدوا دروس عند مين ....ههههه
ليهم ربنا
بس إوعى ف مرة تسأل
أو تبص ف يوم وراك
لجل نقدر نلسعك من فوق قفاك المحروسة حرفياٌ في مواقف كتييييييييييييييير
عجبتني قوي ... يمكن لأني حاسس إنها بتتطبق في المحروسة حرفياٌ في مواقف كتييييييييييييييير
عموماٌ لنا عودة بإذن الله
تحياتي لك وسلااااااامي
في10,كانون الأول,2006 - 05:35 صباحاً, حسن مدني كتبها ...
وللعلم/ تتصل أو ما تتصل،، ح تيجي في القاتورة.. ح تيجي في الفاتورة..
في10,كانون الأول,2006 - 11:22 صباحاً, مروة كتبها ...
اخى واحد تانى\ شكرا لك مع تمنياتى بدوام التواصل
في10,كانون الأول,2006 - 11:34 صباحاً, مروة كتبها ...
اخى حسن مدنى \ هى كل حاجة فالحكومة ممكن تتعطل الا ....الفواتير ....مبنعرفش نوجفها على رأى " رامى قشوع "
في10,كانون الأول,2006 - 11:52 صباحاً, مروة كتبها ...
افندينا \ الله يبارك فيك عالاجازة .....وعشان متتعجبش ...... انا يا ابنى فأجازة مرضى عشان عندى " حصبة المانى" يعنى مينفعش اروح المدرسة ولا الدروس .....عموما الحمد لله .....الظاهر ان قاعدتى فالمدرسة دى خطر عليا الاول اللوز وبعدين حصبة خايفة بعد كدة أسنن من جديد.....
كويس انها عجبتك فالحقيقة انا كنت هنزل موضوع تانى "زجل " فيديو ...بس كل ما انزلة علية عفريت مش عايز ينزل
في13,كانون الأول,2006 - 01:18 صباحاً, شادي كريم ـ مصر كتبها ...
لا أفهم ما كل هذه التعليقات على هذا الكلام الركيك حاولي تتعلمي معني الشعر حاولي تقرئين حتى تستطعين الكابة بدوتن أخطاء لن يمحوها الأوان التى تستخدمينها.. بطلي تفاهة
في13,كانون الأول,2006 - 11:24 صباحاً, مروة كتبها ...
شادى كريم\ على فكرة مش انا اللى كاتباة وان كان بيعبر عن ذوقى ....دة اذا كنت كملتة للاخر....اما عن اخطاء لن يمحوها الاوان...فكنت ممكن امسح التعليق بتاعك وادارى الفضيحة.....لكن فضلت اتركها كأخطاء لا يمحوها الاوان .....عشان تبقى "بصرة"
في13,كانون الأول,2006 - 11:31 صباحاً, طارق محمد محمد على كتبها ...
ايه اخبارك يامروة بتغيبى كثييييييير وتظهرى فجأة ... لعل يكون المانع خيرا ... بصراحة موضوع يهم كل الشعب المصرى خاصة وان شركات 0900 تعيش على قفا الشعب المصرى .... خاصة وان الاعلام المصرى يساعد على النصب على المواطنين الغلابة بس القانون لا يحمى سوى سيادته فقط .
في13,كانون الأول,2006 - 01:57 مساءً, مازن شما كتبها ...
الاخ العزيز والاخت العزيزة ...ابناء مصر الحرة ..مصر ارض الكنانة...مصر العروبة ..أكن اليكم كل محبة واحترام..واشكر باسمي وباسم شعب فلسطين كل الاخوات والاخوة المدونين في تعاطفهم ومساندتهم لقضايا امتهم العربية وبالاخص قضية فلسطين والعراق الحبيب وكل بقعة من وطننا العربي واعترافا مني لكم اقدم هديتي المتواضعة على الرابط التالي والذي يضم خمسة البومات لمكتبة الاسكندرية مرتبة حسب الاختصاص يمكنكم زيارة الرابط ونقل ماترونه مناسبا لمدونتكم .والطيقة موضحة بادراج في مدونتي ...آمل ان ينال اعجابكم واكون قد رددت ولو بشئ رمزي ما تقدمونه لقضايا امتكم ..كل الدعاء للجميع بالتوفيق والتقدم...اخوكم مازن شما
الرابط هو:
http://www.bubbleshare.com/users/profile/89776
في13,كانون الأول,2006 - 05:41 مساءً, مروة كتبها ...
اهلا طارق \ انا الحمد لله كنت تعبانة ومشغولة ....لكن الحمد لله ...نورت المدونة
في25,كانون الثاني,2007 - 11:41 مساءً, محمود موسى كتبها ...
السلام عليكم ورحمة الله وبركاته
جزاكم الله خيرا أخت مروة على نقلك لقصيدتى اللى سعدت جدا واتفاجئت اننا رغم عدم وجود معرفة شخصية بينا نقلتيها عندك
حقيقى سعدت وأرجو أن أكون عند حسن الظن دائما
بس عندى ملحوظة سريعة على شىء بيقع فيه الأغلب ولا أدرى ما السبب
ألا وهو ان اسمى محمود موسى وليس مرسى
جزاكم الله خيرا
وشرف جدا بنقلك للنص :)
في28,كانون الثاني,2007 - 02:02 مساءً, مروة كتبها ...
اخى محمود موسى \ انا اللى زادنى شوف التعرف عليك عشان اشكرك شخصيا واعبر لك ان انا نشرته لانه عمل رائع ويستحق النشر ....واسفة على الخطأ فالاسم مع وعد بتصحيحة ....تحياتى
في31,كانون الثاني,2007 - 09:50 صباحاً, محمود موسى كتبها ... (غير موثّق)
شكرا لذوقك أخت مروة وشكرا أيضا على التعديل
في31,كانون الثاني,2007 - 07:04 مساءً, مروة كتبها ...
العفو أى خدمة
في16,نيسان,2008 - 11:39 مساءً, راشيد كتبها ...
السلام عليكم ورحمة الله تعالى وبركاته
أشكر القدر الذي دلني على دروبكم...
بارك الله فيكم وجزاكم كل الخير...
وحفظكم ورعاكم وسدد خطاكم لما يحب ويرضى
لكم وافر مودتي
و وفائي وإخلاصي...
وأصدق أمنياتي وخالص دعواتي القلبية...
وتقبلوا فائق تقديري وعظيم احترامي...
ولكم مني باقة شكر وعرفان...
مع أجمل المنى
و السلام عليكم ورحمة الله تعالى وبركاته
http://islam.sos4um.net/index.htm